skip to main |
skip to sidebar
ဟိုရက်ပိုင်းက youtube မှာ တွေ့လိုက်တဲ့ ၃ ပွင့်ဆိုင် affair ကြည့်မိတော့ ဖျတ်ခနဲ တွေးဖြစ်လိုက်တာ။
တချို့ကလည်း အဲဒါ ဆင်လုံးကြီးပါ ဆိုတယ်။
ကိုယ်တိုင်လည်း အဲဒီ clip မှာ ဘာမှန်းတော့ မသိ၊ တခုခု လွဲနေသလိုပဲ။
ထားပါတော့ တုချင်တု စစ်ချင်စစ်။
***
နောက်တယောက်နဲ့တွဲလို့ ပေါက်ကွဲတယ်ဆိုတာ ပေါက်ကွဲတဲ့လူဘက်ကလည်း သူ့ တကယ်မချစ်လို့သာ။
တဘက်လူအပေါ် ဘယ်လောက်ချစ်နိုင်တယ်ဆိုတာ အဲလိုအဖြစ်မျိုးမှာ ဖုံးထားလို့ မရအောင် ပေါ်တာပဲလို့ ထင်တယ်။
တချို့လူတွေအတွက် အဲဒီလို အဖြစ်မျိုး ကြုံတာနဲ့ "ငါ့ကို စော်ကားတယ်တို့ လှည့်စားတယ်တို့ ယုံကြည်မှုကို အလွဲသုံးစားလုပ်တယ်တို့ ဒါမျိုးလာကျောလို့ ဘယ်ရမလဲတို့" တွေးကို မတွေးမိဘူး။
"ဪ သူ ငါ့ကို မလိုအပ်တော့ဘူး" ဆိုတာလောက်နဲ့ ဝမ်းနည်းသွားရုံပဲ။ သူတို့ကို ကိုယ်မြင်လိုက်ကြောင်းတောင် သိစေချင်မှာ မဟုတ်ဘူး။
* တကယ်ချစ်ရင် * မပေါက်ကွဲဘူး။ ဒေါကန်ဖို့၊ ပေါက်ကွဲဖို့၊ ရန်သွားတွေ့ဖို့ သတိတောင် ရလိုက်မှာမဟုတ်ဘူး။ ဝမ်းပဲ နည်းမှာ။ တဘက်က မသိအောင် ချက်ချင်း လှည့်ပြန်လာမိမှာ။
***
ဝမ်းလည်းနည်းမယ် ပေါက်လဲကွဲမယ်။ ဒါပေမဲ့ တကယ်လည်းချစ်ပါတယ် လို့ ပြောလာရင် ဒီဂရီအလိုက်ပေါ့ လို့ပဲ ပြောရမယ်ထင်တယ်။ ကိုယ်က သူ့အပေါ် ဘယ်လောက်ချစ်နိုင်လဲဆိုတဲ့ အတိုင်းအတာအရပေါ့။
- ကိုယ့်ကိုယ်ကိုယ်နဲ့ မယှဉ်သာအောင် လျော့ချစ်ရင်တော့ ပေါက်ကွဲရုံသက်သက်ပဲ။ ဒေါသချည်းပဲ ထွက်မိမယ်။ ဝမ်းနည်းတယ်ဆိုရင်တောင် အဲဒါ ငါ့ကိုမှ ဖြစ်ရလေခြင်းဆိုတဲ့ စိတ်ပဲ။ တဘက်လူကိုလည်း ခွင့်မလွှတ်ဘူး။ အခွင့်အရေးရတာနဲ့ လက်တုန့်ပြန်မှာပဲ။
- ကိုယ့်အတ္တနဲ့ တန်းတူဆိုရင်တော့ အထက်ကတယောက်ပြောသလို ဝမ်းလည်းနည်းမယ် ပေါက်လဲကွဲမယ်။ ခွင့်တော့ မလွှတ်နိုင်သေးဘူး။ လက်စားချေရလောက်အောင်လည်းပဲ မရက်စက်နိုင်ဘူး။
- ကိုယ့်အတ္တထက် ကျော်သွားပြီဆိုရင် (တကယ်ချစ်တယ်ဆိုရင်)တော့ ဝမ်းနည်းရုံမျှသာပါပဲ။
တကယ်ချစ်တယ် ဆိုတဲ့ သတ်မှတ်ချက်ကလည်း... ဆိုကြပါစို့။
* ကိုယ်က temperature 21ºC လောက်ကိုမှ တကယ်အေးတယ်လို့ သတ်မှတ်တယ်ဆိုရင် အဲဒီထက်များတဲ့ အပူချိန်က ကိုယ့်အတွက် တကယ်မအေးဘူးပေါ့ *
***
(စာကြွင်း။ ကိုယ့်အပေါ် သူ ဘယ်လောက် အတိုင်းအတာထိ... ဆိုတာ သိချင်တဲ့သူတွေ စမ်းကြည့်ကြဖို့တောင် ကောင်းတယ်။ အဲဒီအခြေအနေမျိုးမှာ တဘက်လူရဲ့စိတ်ထဲရှိသမျှ ညာမရအောင် ပေါ်လာမှာပဲ။ ကိုယ့်လူကို ယုံတယ်၊ ပိုင်လည်း ပိုင်တယ်ဆိုရင်ပြောပါတယ်။
အင်းလေ... ယုံမှတော့ ဘယ်စမ်းကြည့်စရာလိုမလဲ)
***
pic from google
တွေ့ဆုံခြင်း
မိုးအဆုံး နဲ့ မြေအဆုံးလို
မိုးကုပ်စက်ဝိုင်း ဆိုလား
လှည့်စားထားတဲ့ မြင်လွှာအောက်က
ဘယ်လိုမှ မရောက်နိုင်တဲ့ တနေရာမှာ
***
pic from here
တွေ့ဆုံခြင်းတောင်ကမ်းပါးယံ နဲ့ ခေါ်သံလို
ထိခတ် ပြန်ထွက်လာရပေမယ့်
ဝန်းကျင်မှာ ပဲ့တင်ထပ်နေဆဲ...
***pic from google
တွေ့ဆုံခြင်း
လေပွေရူး နဲ့ ကြွေလုဆဲ ရွက်ဝါလို
နောက်တခါ ပြန်(မ)လာလည်း
ဒီနေရာမှာ ငါ မရှိတော့။
***
pic from google
တွေ့ဆုံခြင်း
ပိတ်ထားတဲ့ မှန်ပြတင်းနဲ့ ခုန်ဆင်းတဲ့ မိုးရေစက်လို
စုပ်ယူ စိမ့်ဝင်လို့မရ
ထိတွေ့စဉ် ခဏသာ
***
pic from here
တွေ့ဆုံခြင်း
သန့်စင်တဲ့ ရေ နဲ့ နောက်ကျိစေတဲ့ အမှုံအမွှားလို...
ဘယ်သူက ဘာ ဆိုတာထက်
အကြောင်းတိုက်ဆိုင်လို့ လှုပ်ခတ်တိုင်းမှာ လှိုင်းထ ဝေဝါးတယ်။
***
pic from google
ကျွန်တော့်ဘဝဇာတ်ကြောင်း (သော်တာဆွေ) က အကြောင်းအရာတွေကို သိပ် အသေးစိတ် မမှတ်မိတော့ဘူး။ အဲဒီစာအုပ်တွေကို ကမန်းကတန်းနဲ့ တခါတည်း ဖတ်ခဲ့ရတာဖြစ်တော့... ဒါတောင် အပိုင်း (၁) မပါ။
ပတ္တမြားခင်အကြောင်း ရေးဖြစ်တော့ အကြောင်းအရာတစ်ခု ခေါင်းထဲ ပြန်ပေါ်လာတယ်။
သူတို့ချင်း မိတ်ဆွေတွေဖြစ်တော့ ပတ္တမြားခင်ရဲ့ သမီး မင်္ဂလာဆောင်ဖိတ်စာ သော်တာဆွေ့ဆီကို ကိုယ်တိုင်လာပို့တယ်။ အတိအကျတွေ မမှတ်မိတော့ဘူး။
ဆရာသော်တာဆွေအတွက်က အဲဒီအခိုက်မှာ မင်္ဂလာပွဲလုပ်မယ့် ဟိုတယ်ဆီ တက်ဖို့၊ လက်ဖွဲ့ဖို့စတာတွေက အခက်အခဲ ဖြစ်တယ်။ အဲဒါနဲ့ ဆက်စပ်ပြီး သူ ရေးသွားတာမှာ... တခါလည်း အဲလိုပဲ မိတ်ဆွေတယောက်ရဲ့ မတက်မဖြစ်တဲ့ (သား/သမီး မင်္ဂလာဆောင်) ပွဲတစ်ခု တက်ဖို့ရာမှာ လက်ဖွဲ့စရာ အခက်တွေ့တော့ အိမ်မှာရှိတဲ့ မသုံးဖြစ်တဲ့ ပန်းအိုးတစ်လုံးကို ပက်ကင်ထုပ်ပြီး လက်ဖွဲ့လိုက်ရတယ် ဆိုတယ်။
အဲဒီကနေ ဆက်ရေးတော့ ရှုမဝ ဦးကျော် နဲ့ သူ့ အကြောင်း။
ကျွန်တော့်ဘဝဇာတ်ကြောင်း ကို သိရင် ရှုမဝဦးကျော်နဲ့ သော်တာဆွေကြားက ပတ်သတ်မှု အထူးပြောစရာမလိုပါဘူး။ ဒီလိုသာဖြစ်တယ်။ သူ့အနေနဲ့ ဦးကျော် သားသမီးတွေရဲ့ မင်္ဂလာဆောင် တခါမှ ဖိတ်တာ မခံရဖူးဘူးဆိုတယ်။ တကယ်က သိတောင် မသိလိုက်ရတာ။ မဂ္ဂဇင်းတိုက်မှာ မမြင်ဖူးသေးတဲ့ ကလေးငယ် တစ်ယောက်ယောက်ကို မြင်မိမှ ဒါ ဘယ်သူ့ကလေးလဲ မေးရင်း၊ ဦးကျော်ရဲ့ သား (ဒါမှမဟုတ်) သမီး တစ်ယောက်ယောက် အိမ်ထောင်ကျပြီးသွားလို့ ကလေးတောင် ရပြီဆိုတာ သိရတယ်ဆိုတယ်။
***
ကျောင်းပြီးလို့ လူလုပ်ခဲ့ရတာ မကြာလှသေးပါဘူး။ အဲဒီအတောအတွင်းမှာ အရင်လို လူကြီးနဲ့ ကပ်လိုက်တာမျိုးမဟုတ်ဘဲ ကိုယ့်ကို ဦးတည်ဖိတ်တဲ့ ပွဲတွေလည်း တက်ခဲ့ဖူးပြီးပြီ။ ခုချိန်ထိတော့ ဘယ်ပွဲတက်ဖို့ ခက်ခဲလိုက်တာ ဆိုတာမျိုးတော့လည်း မကြုံဖူးသေးပါဘူး။ ပြောရရင် အင်မတန် စိတ်ပါလက်ပါနဲ့ တက်ခဲ့တဲ့ ပွဲချည်းပါပဲ။
မိတ်ဆွေအပေါင်းအဖော်၊ စာရေးဖော်ရေးဖက်၊
သား သမီးတွေနဲ့ မင်္ဂလာဆောင် ပွဲလမ်းသဘင်၊
ခင်မင်ဆက်နွယ်မှု နဲ့ ဖိတ်ကြား၊ ချီးမြှင့်။
နေ့တိုင်း ထမင်းစား ရေသောက်တာ စာမဖွဲ့လောက်သလိုပဲ၊ လူ့အသိုင်းအဝိုင်းထဲက ဖြစ်ရိုးဖြစ်စဉ် အဲဒီလူမှုကိစ္စတွေလည်း စာမဖွဲ့လောက်ဘူး ထင်ရတယ်။
ဘဝအမျိုးမျိုးက ဆက်နွယ်ပတ်သတ်မှုအမျိုးမျိုးမှာ (လူရင်းတွေမို့ ခင်မင်မှုနဲ့ ဖိတ်တယ် ဆိုတဲ့ ဘာမှမထူးဆန်းတဲ့ အဖြစ်အပျက်နဲ့ ယှဉ်ပြထားတဲ့) လူရင်းတွေမို့ ငဲ့ညှာမှုနဲ့ မဖိတ်ဘူး အသိတောင်မှ မပေးဘူး ဆိုတဲ့အချက်ကို စိတ်ထဲ အတော် လေးလေးနက်နက် ဖြစ်မိတယ်။
တခါတခါ တကယ့်ဘဝထဲက အဲဒီလို အကြောင်းအရာမျိုးကို ဖတ်ရသိရတာ ဘာနဲ့မှ မတူဘူး ထင်မိတယ်။ လူတစ်ဦးတစ်ယောက် အမှန်တကယ် ကြုံခဲ့ရတဲ့ တချို့သော ကိုယ်တွေ့အဖြစ်အပျက်ဆိုတာတွေက ဘယ်လိုကွန့်မြူးနိုင်တဲ့ စိတ်ကူးဉာဏ်ကနေမှ ဖန်တီးလို့ ထွက်မလာနိုင်တဲ့ အရာတွေ။
ကျောက်မျက်တစ်တုံးပေါ် နေရောင်ကျလိုက်လို့ ရောင်ပြန်တွေ ဖြာထွက်လာသလိုပဲ။
ဒီအဖြစ်အပျက်တစ်ခုတည်းပေါ်ကနေ လူရင်းဆိုသူတွေရဲ့ သူ့ဘဝနဲ့သူ၊ သူ့ဖြတ်သန်းမှုနဲ့သူ၊ သူ့အဓိပ္ပါယ်သတ်မှတ်ချက်နဲ့သူ၊ သူ့တန်ဖိုးထားမှုနဲ့သူ ဖော်ပြလာကြတဲ့ ပတ်သတ်ရာပတ်သတ်ကြောင်း အကြောင်းတရားတွေ။
ကိုယ်တိုင်လည်း မင်္ဂလာဆောင်တပွဲတက်ဖို့ ဘယ်အချက်ကတော့ဖြင့် ခက်ခဲလိုက်တာလို့ မကြုံဖူးသေးတော့ (နောင်လည်း ကြုံကောင်းမှ ကြုံရမှာပါလို့ ပိုတွက်နေမိတော့) မကြုံဖူးဘဲ မသိနိုင်မယ့် အကြောင်းအရာတွေ ဒီလိုနည်းနဲ့ သိခွင့်ရတာ ငဲ့ညှာမှုနဲ့ ခင်မင်ခဲ့တဲ့သူ၊ ဒါကိုမှ အပြန်အလှန် သိမှတ်နိုင်တဲ့စိတ်နဲ့ မှတ်တမ်းတင် ရေးထားခဲ့ဖို့သတိရတဲ့သူတွေကို ကျေးဇူးတင်နေမိတော့တယ်။
***
